जंगली हात्तीको आक्रमणबाट एकको मृत्यु

बाँके, १३ पुस । बर्दियामा हात्तीको आक्रमणवाट एकजनाको ज्यान गएको छ । बर्दियाको सदरमुकामदेखि पश्चिमतर्फ रहेको मनाउ गाविस ५ प्रसेनी वजारमा आज विहान बर्दिया राष्ट्रिय निकुञ्जको जंगलबाट आएको हात्तीको बथानले आक्रमण गर्दा सोही गाविसका ३० वर्षीया विमला परियारको ज्यान गएको हो ।

हात्तीको आक्रमणबाट दुई जना गम्भिर घाइते भएको वर्दिया प्रहरीले जनाएको छ । यसरी घाइते हुनेहरुमा सोही गाविस ८ का ५६ वर्षीय रामप्रसाद लामिछाने, सोही गाविस २ का १४ वर्षीय दिनेशशिंह कुरी रहेका छन् ।

घाइते दुवै जनालाई उपचारका लागि नेपालगञ्ज पठाइएको मनाउ प्रहरी चौकीका इञ्चार्ज खटकबहादुर थापाले बताए । हात्तीले अन्य भौतिक संरचनामा पनि क्षति पुर्याएको स्थानीयले जनाएको छ ।