काठमाडौं, ११ पुस । नेपाल वायुसेवा निगमलाई अनुमानभन्दा निकै कम मूल्यमा ठूला जहाज हात परेका छन् । निगमले दुई जहाजका लागि २६ अर्ब रुपैयाँ अनुमान गरेकोमा साढे २२ अर्ब रुपैयाँमै विमान उपलब्ध गराउने गरी एक अमेरिकी कम्पनीले प्रस्ताव गरेको छ ।
राष्ट्रिय ध्वजावाहक नेपाल वायुसेवा निगमले जहाज खरिदका लागि आह्वान गरेको ग्लोबल टेन्डरमा सहभागी कर्पोरेसनले ‘ब्रान्ड न्यू’ जहाज दिने गरी यो प्रस्ताव गरेको छ । कम्पनीको प्रस्ताव अन्य १० कम्पनीमध्ये सबैभन्दा सस्तो हो ।
यसै प्रस्तावलाई आधार मानेर निगमले गठन गरेको सिफारिस समितिले सञ्चालक समितिलाई कर्पोरेसनमार्फत जहाज खरिद गर्न सिफारिस गरेको हो । निगम व्यवस्थापनले प्राविधिक विभागका प्रमुख आरबी शाहको संयोजकत्वमा सिफारिस समिति गठन गरेको थियो ।