बोक्सी भन्दै कुटिएको विषयमा आयोगद्वारा अनुसन्धान सुरु

खोटाङ, २९ कार्तिक । खोटाङको बाँझेच्यानडाँडा–१ सेखुवाकी ७२ वर्षकी वृद्धालाई बोक्सीको आरोपमा कुटपिट भएको घटनाका विषयमा राष्ट्रिय मानव अधिकार आयोगले अनुसन्धान सुरु गरेको छ । बोक्सीको आरोपमा बाँझेच्यानडाँडा–१ सेखुवाकै धनगन्ज राई दम्पतीले गएको जेठ १३ गते ति वृद्धालाई बोक्सी आरोपमा कुटेका थिए ।

पीडित वृद्धाले ‘बोक्सी सम्बन्धी सजाय तथा कसुर अन्तर्गतको मुद्दा दर्ता गर्न खोजे पनि प्रहरीले घटनालाई सार्वजनिक अपराध शिर्षकमा मुद्दा चलाएको’ भन्दै आयोगमा दिएको उजुरीका आधारमा आयोगको उपक्षेत्रीय कार्यालय दिक्तेलले अनुसन्धान सुरु गरेको हो ।

पीडित पक्षले न्यायकालागि दोषीविरुद्ध बोक्सी सम्बन्धी सजाय तथा ऐन कसुरमा मुद्दा चलाउन र न्याय दिलाउन माग गर्दै कात्तिक १ गते आयोगको दिक्तेलस्थित कार्यालयमा उजुरी दिएका थिए ।

उजुरीपछि कात्तिक ४ गतेदेखि १० गतेसम्म आयोगको टोली घटनास्थल गइ पीडित, पीडक तथा प्रत्यक्षदर्शी, आफन्त लगायतलाई भेटेर अध्ययन गरेर फर्किएको छ । यस विषयमा आयोगले सत्यतथ्य पत्ता लगाउन थप अनुसन्धान गरिरहेको जनाएको छ ।