हेलो सरकारमा ५० हजार जनगुनासा

काठमाडौं, ९ असोज । प्रधानमन्त्री तथा मन्त्रिपरिषद् कार्यालय मातहत रहेर सञ्चालन भएको ‘हेलो सरकार’ स्थापना भएको पाँच वर्ष भयो । यो अवधिमा ५० हजारभन्दा धेरै नागरिक गुनासा परेका छन् ।

१७ कात्तिक ०६८ देखि ६ असोजसम्म ५० हजार चार सय गुनासा परेको प्रधानमन्त्री तथा मन्त्रिपरिषद् कार्यालयका उपसचिव प्रद्युम्नप्रसाद उपाध्यायले बताए । सर्वसाधारणबाट परेका गुनासामध्येबाट अहिलेसम्म ९१ दशमलव ८१ प्रतिशत गुनासा फस्र्योट भएका छन् । ‘सम्बोधन हुन लायक सबै उजुरीको ढिलोचाँडो सम्बोधन भएरै छाड्छ,’ उनले भने । ‘हेलो सरकार’ले गुनासो हेरेर प्रत्यक्ष फोन गर्नेदेखि सम्बन्धित निकायलाई पत्र देखेर सम्बोधन गर्दै आएको छ ।

पाँच वर्षमा पाँच प्रधानमन्त्री फेरिए ‘हेलो सरकार’ स्थापना भएको पाँच वर्षको अवधिमा पाँचजना प्रधानमन्त्री भए । तर, सबैभन्दा धेरै गुनासा डा. बाबुराम भट्टराई प्रधानमन्त्री हुँदा परेका थिए ।

कुन प्रधानमन्त्री हुँदा कति गुनासा ?

डा. बाबुराम भट्टराई (१२ भदौ २०६८–३० फागुन २०६९)

परेका गुनासा २० हजार ६ सय ६३

फछ्र्योट  २० हजार ३ सय १९

खिलराज रेग्मी (मन्त्रिपरिषद् अध्यक्ष १ चैत २०६९–२८ माघ २०७०)

परेका गुनासा ६ हजार ८ सय ४

फछ्र्योट ६ हजार ५ सय १

सुशील कोइराला (२८ माघ २०७०–२४ असोज २०७२)

परेका गुनासा ९ हजार ५ सय ८१

फछ्र्योट ९ हजार १ सय ९३ वटा

केपी ओली (२५ असोज २०७२–१९ साउन २०७३)

परेका गुनासा ९ हजार ३ सय १६

फछ्र्योट ७ हजार ५ सय ७९ वटा

पुष्पकमल दाहाल प्रचण्ड (१९ साउन २०७३– ६ असोजसम्म)

परेका गुनासा २ हजार ३ सय ९० वटा

फछ्र्योट १ हजार २ सय ८४ वटा