भैरहवा विमानस्थलमा यति एयरको जहाज दुर्घटना, मानविय क्षति हुनबाट जोगियो

भैरहवा, ८ असोज । भैरहवा विमानस्थलमा अवतरणका क्रममा यति एयरलाइन्सको जहाज आज दुर्घटनामा भएको छ । काठमाडौंबाट आएको यति एयरको जहाज रनवेमा टायर धस्सिएर दुर्घटनामा भएको हो ।

काठमाडौँबाट भैरहवाका लागि अपरान्ह ४ः१५ मा उडेको नाइए एन आईबी कलसाइन भएको यति एयरको उडान नम्बर एवाईटी ८९३ को जहाज रन वे बाट घुम्ने क्रममा घाँसे मैदानमा पुगेर दुर्घटना भएको जिल्ला प्रहरी कार्यालय भैरहवाले जनाएको छ ।

विमान अवतरणका क्रममा चिप्लेर धावनमार्गको १ सय ५० मिटर दक्षिणतर्फ पुगेको छ । जम्मा २९ जना यात्रु र तीन चालकदलका सदस्य रहेको विमानमा मानवीय क्षति भने भएको छैन ।

दुर्घटनास्थलमा नेपाली सेना, विमानस्थलका सुरक्षा अधिकारीलगायतले उद्धार गरेका नागरिक उड्डयन कार्यालय भैरहवाले जनाएको छ । दुर्घटनामा परेको जहाजबाट सबै यात्रुलाई बाहिर निकालिसकिएको जिल्ला प्रहरी कार्यालय रुपन्देहीको सञ्चार शाखाले जनाएको छ।

प्रहरीका अनुसार जहाज सवार पाँचजना यात्रु सामान्य घाइते भएका छन् । उनीहरुको स्वास्थ्य जाँचका लागि भैरहवास्थित युनिभर्सल मेडिकल कलेजमा लगिएको छ । यति एयरले यो घटनामा सबैजना यात्रु र चालक दलका सदस्यहरु सुरक्षित रहेको जनाएको छ ।