इन्द्रेणी संवाददाता
दाङ, ३० भदौ । दाङका खोलाहरुबाट अवैधरुपमा दुंगाजन्य वस्तु ओसारपसार गर्ने क्रम रोकिएको छैन । रातको समयमा प्रहरी प्रशासनको आँखा छल्दै विभिन्न खोलाहरुबाट ढुंगा, गिट्टी, वालुवालगायतका नदिजन्य वस्तु ओसारपसार गर्ने काम भइरहेको छ ।
कारवाहीमा परेका टेक्टरहरुलाई जनही ५ हजार जरीवाना गरिएको जिविस दाङले जनाएको छ । जसबाट दुई महिनामा ४ लाख १५ हजार राजस्व संकलन भएको छ । चुरे संरक्षणका लागि भन्दै नदिजन्य वस्तुमा रोक लगाइएका खोलाहरुमा रातको समयमा तस्कारहरुले स्काभेटर लगाएर उत्खनन् गर्ने र रातकै समयमा प्रहरी प्रशासनको आँखा छल्दै ओसारपसार गर्ने गरेका छन् ।
यसैवीच जिल्ला दैबि प्रकोप उद्धार समितिले राप्ती र बबई नदिसहित ११ वटा खोलाहरुका विभिन्न स्थानहरुबाट निश्चित ढुंगाजन्य बस्तु निकासीका लागि प्रकृया अघि बढाएको छ । राष्ट्रपति चुरे संरक्षण समितिमा उत्खनन् र निकासीका लागि अनुमती माग गरिएको र प्राबिधिकको टोलीले अध्ययन तथा अनुगमन गरेपछि त्यसको रिपोर्टका आधारमा उत्खनन् र निकासीको शुरु हुने जिविसका सूचना अधिकृत कृष्ण केसीले जानकारी दिए ।