ritu khanal

मालिनी बोल्छ गाढा

रितु खनाल

दिनदिन सँग बस्दा प्यार गर्नै लजायौ
अब दिन मुख फोरी बोल्न थाली हँसायौ
प्रणय पल बनाई आज बाटै पराग
निशदिन छु तयारी भन्छ पाएर राग ।
कति दिन सब साँचौँ आज सौन्दर्य चाखौँ
अब नवरस छर्दै लाज बाँकी नराखौँ
शशिवदन भएकी केतकी रुप माला
तन नयन लजाई छोड प्रेमाङ्क भाला ।

महकमन भएमा सार संसार चित्र
महक स्वर निकाली गुन्गुनाऊ बिचित्र
हरहर पसिनाले भिज्न थालेछ सास
पथ पनि नजिकैमा खोज्छ तिम्रो सुवास ।

फरक सुख मिलेको रात सारेर टार
चहकपन समेटी राख राम्रा बिचार
मदनरस पिए झैँ भोगले टन्न आँखा
तन वदन फिजाई बन्न थाले चनाखा ।
तनसँगतन जोडी पाइने छैन पक्का
किन किन मन बास्ना खोज्छ पारेर छक्का
लुकिकन अझ छुट्टै खेल खेल्ने इरादा
नवरस कवितामा मालिनी बोल्छ गाढा ।
@रितु ✍️✍️

About Kesharman Bc

Social Media Auto Publish Powered By : XYZScripts.com